امارات میں "ابوظہبی اور فجیرہ" تک "اتحاد ٹرین" چل پڑی

دبئی سے ابوظہبی اور فجیرہ کا سفر اب مزید آسان، تیز اور آرام دہ۔ دبئی اور ابوظہبی میں پبلک ٹرانسپورٹ کے نظام میں ایک اور بڑا اضافہ۔ دبئی میں اتحاد ریل کا نیا عالی شان اسٹیشن مسافروں کے لیے کھول دیا گیا ہے جو میرا گلف اسٹیٹ کے قریب واقع یہ اسٹیشن اب دبئی کو قومی ریل نیٹ ورک کے ذریعے ابوظہبی اور فجیرہ سے جوڑ رہا ہے۔ 30 ستمبر کی صبح 6 بج کر 14 منٹ پر پہلی مسافر ٹرین عالیہ لیس اسٹیشن سے روانہ ہوئی اور یوں دبئی سے بین الامارات ریل سفر کے نئے دور کا آغاز ہو گیا۔ دبئی سے ابوظہبی کے محمد بن زاید سٹی اسٹیشن تک سفر تقریباً ایک گھنٹے میں مکمل ہوگا جبکہ ٹکٹ 39 درہم سے شروع ہو رہا ہے۔ فجیرہ جانے والے مسافروں کے لیے کرایہ 29 درہم سے شروع ہوگا۔ یعنی روزانہ دبئی اور ابوظہبی کے درمیان سفر کرنے والے افراد کے لیے اب گاڑی چلانے اور ٹریفک میں وقت گزارنے کی بجائے ایک نیا اور آرام دہ آپشن موجود ہے۔ اتحاد ریل کے مطابق مسافر ٹرین سروس کے ذریعے سفر کے وقت میں کمی، سڑکوں پر ٹریفک کے دباؤ میں کمی اور مختلف امارات کے درمیان آمد و رفت میں مزید سہولت پیدا ہوگی۔ مسافر اپنے سفر کی منصوبہ بندی، ٹکٹوں کی دستیابی اور روانگی کے اوقات کے بارے میں اتحاد ریل کی سرکاری ویب سائٹ اور موبائل ایپ سے تازہ ترین معلومات حاصل کر سکتے ہیں۔ اس سروس کے ذریعے مسافروں کو دبئی سے ابوظہبی اور فجیرہ کے علاوہ قومی ریل نیٹ ورک کے دیگر مقامات تک بھی سفر کے مزید مواقع میسر آئیں گے۔ اسٹیشن پر مسافروں کی رہنمائی، ٹکٹنگ اور انتظار کے لیے بنیادی سہولیات بھی فراہم کی گئی ہیں جبکہ سفر سے پہلے مقررہ وقت پر اسٹیشن پہنچنے کی ہدایت بھی کی گئی ہے۔ اور سہولت صرف اسٹیشن تک محدود نہیں، عالیہ لیس اسٹیشن دبئی میٹرو ریڈ لائن سے پیدل پل کے ذریعے منسلک ہے جس سے مسافروں کے لیے میٹرو اور ٹرین کے درمیان سفر مزید آسان ہو گیا ہے۔ ٹرین میں آرام دہ نشستوں کے ساتھ وائی فائی، چارجنگ پورٹس اور سامان رکھنے کی سہولت بھی موجود ہے جبکہ پریمیم کلاس میں مزید سہولیات فراہم کی گئی ہیں۔ اتحاد ریل کا یہ سفر صرف دبئی اور ابوظہبی کو جوڑنے کا منصوبہ نہیں بلکہ یہ متحدہ عرب امارات کے مختلف شہروں اور کمیونٹیز کو ایک جدید اور مضبوط ریل نیٹ ورک سے جوڑنے کی جانب ایک اہم قدم ہے۔ یہ منصوبہ ملک میں پائیدار اور ماحول دوست سفری نظام کے فروغ میں بھی اہم کردار ادا کرے گا کیونکہ ریل کے ذریعے سفر سے نجی گاڑیوں پر انحصار اور سڑکوں پر ٹریفک کا دباؤ کم کرنے میں مدد مل سکتی ہے اور آنے والے دنوں میں یہ نیٹ ورک مزید پھیلایا جائے گا۔ دبئی سے ابوظہبی، دبئی سے فجیرہ، اب سفر سڑکوں کے ساتھ ساتھ ریل پر بھی۔ یہ ہے متحدہ عرب امارات کا نیا سفری تجربہ۔ اتحاد ریل، سفر بھی آسان، وقت بھی محفوظ۔