علاش أثمنة شركة Ryanair رخيصة 💵

شنو اللي غادي يخلي Ryanair ولا أي شركة ديال الطيران تبيع تذكرة بهاد الثمن وتبقى رابحة ومستمرة؟ واخا جميع الانتقادات و تقدر تعتبر هي أسوأ شركة ديال طيران ولكن هي الأكثر مبيعا اللي كاينه في السوق. وأول سبب علاش Ryanair رخيصة هو التوحيد ديال الأسطول، شركة ديال طيران ما كتخدمش بزاف ديال الأنواع ديال الطيارات، عندها نوع واحد اللي كيمثل أكثر من 90% ديال الطيارات ديالها اللي هو البوينغ 737. دونك حتى فاش كتبغي تاخد لي بياس دو غوشونج أولا المينتونس أو لي بيروط اللي كيخدموا معاها فكتكونصونطرا على موديل واحد. سبب ثاني هو اختيار المطارات، المطارات واخا هي منشآت ديال الدولة ولكن الطيارات وشركات ديال طيران باش ينزلوا أو يطلعوا من دوك المطارات فكيخلصوا لي سيرفيس ديالهم وريانير ديما كتختار دوك المطارات الصغار اللي كيقبلوا عليها أقل، أو عوض ما تختار مطار ديال بروكسايل كتختار ديال شارل لوروا و عوض ما تختار باريس شارل دوغول كتختار باريس بوفيه. درجة أنه كاين بعض المدن وبعض البلديات اللي فيهم مطارات صغار هما اللي كيخلصوا ريانير باش أنها دير البرمجة ديال رحلات لديك المدينة باش تخلق رواح اقتصادي وسياحي لديك المنطقة. وسبب آخر هو أن ريانير كتخدم بزاف مع شركات ديال لانتيريم، يعني دوك الموظفين اللي كيخدموا مع ريانير في المطارات أو في الطيارات ماشي موظفين مباشرين ديال شركة ريانير ولكن ديال شركات أخرى ديال لانتيريم وريانير كتخلص لا بريستاسيون دو سيرفيس لديك الشركات مقابل دوك الموظفين. يعني بزاف ديال لي شارج سوسيال اللي كيجيوا مع لي سالاري ما فيهمش ريانير. وسبب آخر هو المداخيل ديال ريانير بأكثر من 30% ما مرتبطةش بالأثمنة ديال التذاكر أو البيع ديال التذاكر ولكن دي بونيس آخرين بحال مثلا فاش كتنسى ما تمبريمييش البوردينغ باس خصك تخلص عليه. والمشتريات اللي كتخلصها خلال الرحلات. وأسوأ حاجة في ريانير هي اللي كتبغي تجيب شي باليزا زايدة بغرامات إضافية أو شي ساكادو اللي القياس ديالو أكبر من القياس ديال ريانير، أولا غادي تخلص مصاريف إضافية اللي بعض المرات كتكون فايتة و أضعاف مضاعفة ديال ثمن التذكرة. وسبب آخر ريانير ديما رابحة هي أنها ما كديرش ترونزييت، كتدي من مطار أ لمطار ب رحلة مباشرة. زائد ريانير فاش كتاخد طائرة دائما كتزيد الطاقم ديالها اللي هو 20% حتى ل 25%. وآخر سبب غادي نشاركوا معاك هو المدة اللي كتوزها ريانير في الأرض، ريانير عارفة بأن الرباح كي في السما ماشي في الأرض، وبالتالي المدة اللي كتوزها ريانير بين 25 دقيقة حتى ل 35 دقيقة. و مقارنة مع شركات طيران أخرى اللي كتخدم من 45 دقيقة حتى لساعة و نص. داكشي اللي كيخلي ريانير عوض ما شركات دير من 4 رحلات في النهار، كتقدر دير حتى ل 8 رحلات في النهار.